اسلامی تعاون تنظیم”او آئی سی” کے ذیلی ادارے تعلیم اور سائنس و ثقافت” آئیسیسکو” نے مقبوضہ بیت المقدس کے خلاف جاری صہیونی ریشہ دوانیوں کی شدید الفاظ میں مذمت کرتے ہوئے عالم اسلام سے مقدس شہر کے اسلامی تشخص کی حفاظت کے لیے ٹھوس حکمت عملی اختیار کرنے پر زور دیا ہے۔
مرکزاطلاعات فلسطین کے مطابق”آئیسیسکو” کے ڈائریکٹر جنرل ڈاکٹر عبدالعزیز التویجری نے عمان میں اردنی وزارت تعلیم کے ایک اعلیٰ سطحی وفد سے گفتگو کرتے ہوئے کہا کہ تنظیم بیت المقدس کے اسلامی تشخص کو برقرار رکھنے کے لیے ہر مُمکن کوششیں جاری رکھے گی۔
انہوں نے کہا کہ عالم اسلام کو بخوبی اندازہ ہونا چاہیے کہ یہودیوں کے ہاتھوں بیت المقدس کی اسلامی شناخت مٹانے کی سازشیں کس تیزی کے ساتھ جاری ہیں۔ ان سازشی ہاتھوں کو روکنا تمام مسلمانوں کی ذمہ داری ہے۔ آئی سیسکو اپنے پلیٹ فارم سے بیت المقدس کے خلاف جاری صہیونی ریشہ دوانیوں کی روک تھام کے لیے کام جاری رکھے گی۔
آئیسیسکو کے ڈائریکٹر جنرل کا کہنا تھا کہ یہودی ایک سوچی سمجھی سازش کے تحت بیت المقدس کی اسلامی شناخت کو مٹانے کے درپے ہیں تاکہ مسلمانوں کے اس تاریخی ثقافتی اور تہذیبی مرکز پر اپنا تسلط قائم کرنے میں کامیابی حاصل کرسکیں۔
ڈاکٹر التویجری کا کہنا تھا کہ "آئیسیسکو” عرب اور اسلامی ملکوں میں پائے جانے والے تنازعات کے پُرامن حل کے لیے بھی کوشاں ہے تاکہ اسلامی اخوت اور بھائی چارے کو فروغ دیتے ہوئے عالم اسلام کے اجتماعی تشخص کو برقرار رکھا جا سکے۔
بشکریہ:مرکز اطلاعات فلسطین