مرکز اطلاعات فلسطین کے مطابق ’’سواس‘‘ گروپ آف کالج کے زیراہتمام جمعہ کے روز ایک ریفرنڈم کرایا گیا جس میں 73 فی صد شرکاء نے صہیونی ریاست کے تعلیمی بائیکاٹ کے حق میں ووٹ ڈالے جبکہ صرف 27 فی صد نے اس کی مخالفت کی۔
دو ہفتے قبل کالج کی لیکچراریونین کی جانب سے اسرائیل کے تعلیمی بائیکاٹ کا فیصلہ کیا گیا تھا جس کے بعد پورے کالج کی سطح پر بائیکاٹ کے لیے ایک ریفرنڈم کرانے کا اعلان کیا گیا۔
رپورٹ کے مطابق رائے شماری میں 1708 طلباء وطالبات نے حصہ لیا، جن میں سے 1283 نے اسرائیل کے بائیکاٹ کے حق میں ووٹ ڈالا۔ یہ تعداد کل شرکاء کا 75 فی صد ہے۔ 425 طلباء نے بائیکاٹ کی مخالفت کی۔ 305 اساتذہ میں سے 182 نے بائیکاٹ کے حق میں اور 123 نے مخالفت میں رائے دی۔ کالج کے دیگرعملے کے 39 ارکان نے بائیکاٹ کے حق میں صرف چار نے مخالفت میں رائے دی۔
خیال رہے کہ برطانیہ میں ’’سواس‘‘ گروپ آف کالج نہ صرف ملک کا سب سے بڑا تعلیمی ادارہ ہے بلکہ اس کی تحقیقات اور تدریس کے معیار کو عالمی سطح پر تسلیم کیاجاتا ہے۔
اس کالج کا افتتاح قریبا ایک صدی قبل سنہ 1916 ء میں اس وقت کے شاہ انگلینڈ جارج پنجم نے رکھا تھا۔ یہ کالج برطانیہ کےدیرینہ تعلیمی اداروں میں سے ایک ہے۔ کالج میں نہ صرف مقامی طلباء وطالبات زیرتعلیم ہیں بلکہ دوسرے ممالک کے طلباء کی کثیرتعداد بھی داخلہ لیتی ہے۔
بشکریہ:مرکزاطلاعات فلسطین