کفر قاسم (روز نامہ قدس ۔آن لائن خبر رساں ادارہ) مقبوضہ فلسطین کے سنہ 1948ء کے علاقے کفر قاسم میں ایک گھر میں جمعہ کی صبح ہونے والی آتش زدگی کے نتیجے میں دو کم سن بھائی جاں بحق اور تین افراد جھلس کر زخمی ہوگئے۔
روز نامہ قدس کو موصول ہونے والی اطلاعات کے مطابق گھر میں آتش زدگی کا المناک واقعہ جمعہ کو علی الصباح کفر قاسم کے مقام پر پیش آیا۔ حادثے کی وجہ شارٹ سرکٹ بتائی جاتی ہے۔
گھر میں بھڑک اٹھنے والی آگ کی لپیٹ میں آ کر کم سن دو بچے معاویہ اور رستم صرصور جاں بحق اور تین افراد زخمی ہوگئے۔ ان کی عمریں تین اور پانچ سال بتائی جاتی ہیں۔
آتش زدگی کے بعد امدادی ٹیمیں جائے وقوعہ پر پہنچ گئی مگر اس وقت تک دو بچے بری طرح جھلس جانے سے جان کی بازی ہارچکے تھے۔
جھلس کر زخمی ہونے والے بچوں کو شنایدر اور بیلینسن اسپتالوں میں منتقل کردیا گیا ہے۔