قابض اسرائیلی فوج نے فلسطین کے مقبوضہ شہروں میں تلاشی کی کارروائیوں کے دوران کم سے کم دو فلسطینی شہریوں کو حراست میں لینے کے بعد نامعلوم مقام پر منتقل کردیا ہے۔ ایک فلسطینی نوجوان کی گرفتاری مقبوضہ مغربی کنارے کے شہر جنین میں برقین قصبے سے عمل میں لائی گئی جب کہ سنہ 1948ء کے علاقے کے رہائشی کو نابلس سے حراست میں لیا گیا۔
مقامی فلسطینی ذرائع نے مرکز اطلاعات فلسطین کو بتایا کہ سوموار کے روز تلاشی کی کارروائیوں میں دو فلسطینی نوجوانوں کی گرفتاری کی تصدیق ہوئی ہے۔ حراست میں لیے جانے والوں میں 19 سالہ ھانی محمد غانم اور دوسرے کی شناخت 23 سالہ احمد عزت دغلس کے نام سے کی گئی ہے۔
احمد عزت کو اس وقت حراست میں لیا گیا جب وہ مغربی کنارے کے شمالی شہر نابلس میں برقہ کے مقام سے ایک فوجی چوکی کے پاس سے گذر رہا تھا۔
حراست میں لیے جانے کے بعد دونوں فلسطینی نوجوانوں کو نامعلوم مقام پر منتقل کردیا گیا ہے۔ خیال رہے کہ پچھلے دو ماہ کے دوران اسرائیلی فوج نے نہتے فلسطینیوں کی اندھا دھند گرفتاریوں کا سلسلہ شروع کر رکھا ہے۔ جون اور جولائی کے مہینوں میں کم سے کم 2000 فلسطینی شہریوں کو گرفتار کرکے جیلوں میں ٹھونسا گیا۔