مغربی کنارے کے قدیم تاریخی شہر الخلیل میں اسرائیلی فوج نے مسجد ابراھیمی میں داخل ہونے والی ایک فلسطینی نوعمر لڑکی اور ایک فلسطینی خاندان کو زدوکوب کیا اور بہیمانہ تشدد کا نشانہ بنایا ہے۔
اسرائیلی فوجی اہلکاروں نے فلسطینی خاندان کو گھنٹوں حراست میں لیے رکھا۔
مقامی ذرائع نے بتایا کہ صہیونی اہلکاروں نے اٹھارہ سالہ روان سکافی کو اس وقت روک پر تشدد کا نشانہ بنایا جب وہ جلیل القدر پیغمبر حضرت ابراھیم خلیل اللہ سے منسوب مسجد ابراھیمی میں داخل ہونے کی کوشش کر رہی تھی۔
دوسری جانب اسرائیلی فوج نے ایک اسی شہر میں خلیل حراحشہ نامی فلسطینی شہری کے گھر پر دھاوا بولا اور حراحشہ اور اس کے بیٹے کو بہیمانہ تشدد کا نشانہ بنایا۔ اس دوران سارے گھر والوں کو باہر نکال کر ان سے گھنٹوں پوچھ گچھ کی جاتی رہی۔ اسرائیلی اہلکاروں نے سارے گھر کی تلاشی لی اور بڑے پیمانے پر توڑ پھوڑ بھی کی۔
مزید برآں اسرائیلی فوج نے شہر کے دیگر علاقوں پر بھی چھاپہ مار کارروائیاں کرکے شہریوں کو زدو کوب کیا۔ بنی نعیم، الظاھریہ میں صہیونی فوج متعدد چیک پوسٹیں قائم کرکے فلسطینی گاڑیوں کو روک کر مسافروں سے تفتیش کرتی رہی۔