قابض اسرائیلی سکیورٹی فورسز نے صہیونی جیلوں میں بھوک ہڑتال کرنے والے فلسطینی اسیران سے یک جہتی کے لیے رام اللہ کے قریب عوفر جیل کے سامنے فلسطینی دھرنے پر حملہ کرکے متعدد افراد کو تشدد کا نشانہ بنایا۔
عینی شاہدین نے بتایا کہ صہیونی اہلکاروں کی بڑی تعداد نے عوفر جیل کے سامنے احتجاج دھرنا دینے والے سیکڑوں فلسطینیوں پر دھاوا بول دیا۔ دھرنے کے شرکاء کو واپس جانے پر مجبور کرنے کے لیے اشک آور گیس کے شیل برسائے گئے جس سے درجنوں افراد دم گھٹنے سے شدید تکلیف میں مبتلا رہے۔
عینی شاہدین نے بتایا کہ پر امن احتجاج کرنے والوں پر حملہ آور فوجی اہلکاروں نے قوت کا بے دریغ استعمال کرنے کی توجیہ بیان کرتے ہوئے کہا کہ یہ دھرنا غیر قانونی طور ہے۔ مقامی ذرائع کا کہنا ہے کہ اسرائیلی فورسز کی دھرنے کے شرکاء پر حملے کے بعد مقامی نوجوانوں نے جیل کے سامنے رکاوٹیں کھڑی کر کے اور ٹائر جلا کر احتجاج شروع کر دیا تاہم اسرائیلی فوج نے ان نوجوانوں پر بھی ربڑ کی گولیوں کی بوجھاڑ کر دی جس سے نوجوانوں کو منتشر ہونا پڑا۔