ہزاروں سوگواران کی موجودگی میں اسرائیلی غارت گری میں شہید ہونے والے القسام بریگیڈ کے محمد زاھر الکیلانی کو سپرد خاک کر دیا گیا۔ فلسطینی حکومت نے شمالی غزہ پر فلسطینی بحری پولیس کے ہیڈ کوارٹر پر صہیونی بمباری کو کڑی تنقید کا نشانہ بنایا ہے۔ پیر کی علی الصبح اس جارحیت میں ایک فلسطینی شہید اور چار زخمی ہو گئے تھے۔
’’مرکز اطلاعات فلسطین‘‘ کے نمائندے نے بتایا کہ شہید ہونے والے الکیلانی کا تعلق اسلامی تحریک مزاحمت ۔ حماس کے عسکری ونگ القسام بریگیڈ سے تھا جنہیں بریگیڈ کے کارکنوں اور ہزاروں فلسطینی شہریوں نے سپرد خاک کر دیا ہے۔ قبل ازیں فلسطینی میڈیکل سروسز کے عملے نے بمباری میں بری طرح متاثر ہونے والی ان کی نعش کو کمال عدوان ہسپتل منتقل کر دیا تھا۔
مرکز کے نمائندے کے مطابق زخمی ہونے والے چار میں سے تین افراد کو الشفاء ہسپتال جبکہ ایک کو کمال عدوان ہسپتال منتقل کیا گیا ہے جس کی حالت انتہائی تشویشناک ہے۔
ذرائع کے مطابق اسرائیلی ایف سولہ طرز کے طیارے نے پولیس ہیڈ کوارٹر پر کئی راکٹ داغے تھے جس سے یہ عمارت مکمل طور پر تباہ ہو گئی ہے۔
دوسری جانب پیر کی علی الصبح بیت لاھیا کے قریب کی جانےوالی اس بمباری پر وزیر اعظم اسماعیل ھنیہ کی سربراہی میں چلنے والی فلسطینی حکومت نے شدید ردعمل کا اظہار کیا ہے۔
فلسطینی حکومت کے ترجمان طاھر نونو کی جانب سے جاری کردہ مذمتی بیان میں کہا گیا ہے کہ شہید الکیلانی قومی فرائض کی ادائیگی میں شہید ہو گئے ہیں۔ انہوں نے زخمی ہونے والے چار افراد کی جلد صحت یابی کی دعا کی۔
طاھر نونو کا کہنا ہے کہ اس حملے کے بعد ہم نے مصری حکومت سے رابطہ کر کے اس ہولناک کارروائی سے آگاہ کیا ہے۔ انہوں نے کہا کہ فلسطینی قوم کسی صورت اسرائیلی غارت گریوں کو برداشت نہیں کرے گی۔
فلسطینی حکومت ترجمان نے تبادلہ اسیران معاہدے کے بعد سےغزہ پر اسرائیلی تیز ہوتے ہوئے حملوں کے منہ توڑ جواب کی ضرورت پر زور دیا اور کہا کہ اسرائیل کو یہ یاد رکھنا چاہیے کہ اس طرح کی بزدلانہ فضائی کارروائیوں سے فلسطینیوں کو اپنے موقف سے ہٹایا نہیں جا سکتا ہے۔ انہوں نے کہا کہ صہیونی دہشتگردی کی کارروائیوں کے بعد فلسطینی قوم کی ثابت قدمی میں مزید اضافہ ہوتا جا رہا ہے۔