مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی ریاست کے جلادوں نے ایک اور فلسطینی قیدی کو دوران حراست انسانیت سوز تشدد کرکے شہید کردیا۔ ایک ہفتے میں اسرائیلی زندانوں میں جام شہادت نوش کرنے والا یہ دوسرا فلسطینی ہے۔
روز نامہ قدس کو موصول ہونے والی اطلاعات کے مطابق غرب اردن کےشمالی شہر نابلس کے رہائشی 36 سالہ یاسر حامد اشتیہ ’’بئرسبع‘‘ کی جیل میں پابند سلاسل تھے۔ رات کے وقت انہیں اسرائیلی جلادوں نے تشدد کا نشانہ بنایا اور حالت خراب ہونے کے بعد اسے کال ٹھڑی میں پھینک دیا گیا جہاں صبح دوسرے قیدیوں نے اسے مردہ حالت میں پایا۔
فلسطینی وزارت صحت نے اشتیہ کی اسرائیلی جیل میں دوران حراست شہادت کی تصدیق کی ہے اور کہا ہے کہ یاسر اشتیہ کی موت تشدد اور علاج میں مجرمانہ غفلت کےباعث ہوئی ہے۔
شہید یاسر حامد اشتیہ کو 2009ء میں صیہونی آباد کاروں کے قتل کے الزام میں عمرقید کی سزا سنائی گئی تھی۔
رواں ہفتے غزہ کی پٹی کے 51 سالہ فارس بارود کو بھی اسرائیلی زندان میں شہید کردیا گیا تھا۔