ٹی وی انتظامیہ کا کہنا ہے کہ انہیں پچھلے ایک ہفتے سے اسرائیلی حکام کی جانب سے سنگین نتائج کی دھمکیاں مل رہی تھیں، جس کے بعد انہوں نے عارضی طور پر نشریات روکنے کا فیصلہ کیا ہے۔
مرکز اطلاعات فلسطین کےمطابق ٹیلی ویژن چینل کے ڈائریکٹر جنرل محمد زیدان نے ایک نیوز کانفرنس سے خطاب میں بتایا کہ ” مجھے اور میرے ساتھیوں کو پچھلے ایک ہفتے سے صہیونی قابض حکام کی جانب سے مسلسل دھمکیاں مل رہی تھیں۔ ان دھمکیوں میں ہمیں ٹیلی ویژن چینل کی نشریات برقرار رکھنے پر سنگین نتائج کی دھمکیاں دی گئی تھیں۔ ان دھمکیوں میں کہا گیا تھا کہ اگر چینل کی نشریات بند نہ کی گئیں تو اسرائیل ٹی وی چینل کا سیٹلائیٹ سے رابطہ منقطع کر دے گا۔
محمد زیدان نے بتایا کہ اسرائیلی حکام کی جانب سے انہیں کہا گیا تھا کہ اس مقبوضہ شہر الد میں اسرائیل کے "بن گوریون” ہوائی اڈے کے راڈار اور ٹیلی کمیونیکشن کی دیگر کمپنیاں بھی متاثر ہو رہی ہیں۔ لہٰذا ٹی وی کی نشریات جلد از جلد بند کر دی جائیں۔
فلسطینی صحافی نے کہا کہ انہوں نے ماہرین کی مختلف ٹیمیں بھی آس پاس کے علاقوں میں بھجوائیں تاکہ اسرائیلی حکام کے اعتراضات کی جانچ پڑتال کی جا سکے اور مسئلے کا کوئی تکنیکی حل نکالا جائے لیکن ماہرین کا کہنا ہے کہ ٹی وی کی نشریات کے باعث قرب جوار میں کوئی دوسری چیز متاثر نہیں ہو رہی ہے۔