اسرائیلی جیلوں میں فلسطینی بچوں کا ٹرائل انسانیت کے خلاف جرم ہے: الشیخ صبری

فلسطین کے ممتاز عالم دین اور سپریم علماء کونسل کے چیئرمین الشیخ عکرمہ صبری نے اسرائیلی پولیس اور فوج کے ہاتھوں فلسطینی بچوں کی گرفتاری اوران کے خلاف عدالتوں میں نام نہاد الزامات کے تحت مقدمات کا قیام انسانیت کے خلاف سنگین جرم قرار دیا ہے۔
مرکز اطلاعات فلسطین کے مطابق الشیخ صبری نے نماز جمعہ سے قبل مسجد اقصیٰ میں اجتماع سے خطاب کرتے ہوئے کہا کہ اسرائیل خود کو ایک جمہوری اور انسانی حقوق کا چمپین سمجھتا ہے لیکن جس قدر انسانی حقوق کی پامالیاں صہیونی ریاست کی جانب سے کھلے عام کی جاتی ہیں دنیا میں ‌اس کی اور کہیں مثال نہیں ملتی۔
انہوں نے کہا کہ اسرائیلی فوج اور پولیس بغیر کسی الزام کے فلسطینی بچوں کو اغواء کرکے ان پر جعلی مقدمات قائم کرتی اور انہیں ظالمانہ سزائیں دلواتی ہے۔ اسرائیلی ریاست کے اس ظالمانہ ہتھکنڈے کے استعمال کا اصل مقصد کم سن فلسطینیوں کے ذہن میں خوف اور رعب طاری کرنا ہے تاکہ وہ بڑے ہو کر تحریک آزادی فلسطین کو آگے بڑھانے سے دور رہیں۔

انہوں ‌نے کہا کہ کم عمر بچوں‌ کی گرفتاری اور ان کا جوڈیشل ٹرائل دنیا کے کسی بھی قانون کی رو سے درست نہیں ‌ہے۔ اسرائیل دنیا کے تمام انسانی حقوق اور بین لااقوامی قوانین کو بالایے طاق رکھتے ہوئے فلسطینی بچوں سے نہایت ظالمانہ سلوک  کررہا ہے۔

الشیخ صبری کا کہنا تھا کہ اسرائیل میں تمام صہیونی جماعتیں قبلہ اول کے خلاف سازشوں میں ملوث ہیں۔ انہوں نے کہا کہ یہ بات درست نہیں کہ صرف انتہا پسند یہودی ہی مسجد اقصیٰ میں مذہبی رسومات کی ادائی کے لیے یلغار کرتے ہیں بلکہ اسرائیل میں دائیں اور بائیں بازو سے تعلق رکھنے والے گروپ قبلہ اول کی جگہ مذموم ہیکل سلیمانی کی تعمیر کے لیے ایک ہی جیسا موقف رکھتے ہیں اور سب ایک ہی پالیسی پرعمل پیرا ہیں۔

بشکریہ:مرکزاطلاعات فلسطین