(روز نامہ قدس ۔آنلائن خبر رساں ادارہ ) صیہونی ریاست کے ذرائع کا دعویٰ ہے کہ فلسطینی مزاحمت کاروں کے بڑھتے ہوئے غیر معمولی حملے اسرائیل کی سلامتی کےلئے سنگین خطرہ بن چکے ہیں۔
فلسطین پر قابض غیر قانونی صیہونی ریاست اسررائیل کی معروف عبرانی نیوز ویب سائٹ Ynet نے اپنی رپورٹ میں انکشاف کیا ہے کہ مقبوضہ مغربی کنارے کے مختلف شہروں میں فلسطینی مزاحمت کاروں کی جانب سے روزانہ کی بنیاد پر کئے جانے والی کاروائیاں اب اسرائیل کی سلامتی کےلئے سنگین خطرہ بن چکی ہیں جس سے نمٹنے کےلئے صیہونی ریاست کی سیکیورٹی کابینہ نے "مزاحمت کاروں ” اور ان کے مالی معاونین سے نمٹنے کے لیے صیہونی اعظم بنجمن نیتن یاہو اور وزیر دفاع یوو گیلنٹ کی طرف سے تجویز کردہ اقدامات کی منظوری دے ددی ہے۔
ویب سائٹ نے اس حوالے سے کوئی تفصیلات فراہم نہیں کی ہے کہ کس قسم کے سیکیورٹی اقدامات کی منظوری دی گئی ہے اور اس کے علاوہ اجلاس میں دیگر کون سے ایجنڈوں پر گفتگو کی گئی تاہم یہ ضرور بتایا ہے کہ اجلاس میں فلسطینی مزاحمت کاروں کے ہاتھوں اسرائیلیوں کے قتل کو اسرائیل کی سلامتی سے جوڑا گیا ہے اور اس کے خلاف ہنگامی اقدامات کا فیصلہ کیا گیا ہے۔