فلسطینی سیکیورٹی ذرائع نے بتایا ہے کہ اسرائٰیلی فوج کی نیوی فورسز نے غزہ کے سمندر میں جنگی مشقیں شروع کی ہیں، جن میں کم فاصلے تک مار کرنے والے نئے میزائلوں کے تجربات کیے جا رہے ہیں۔
مرکز اطلاعات فلسطین کے مطابق اسرائیلی فوج کی جنگی مشقیں بدھ کے روز غزہ کی سمندری حدود میں شروع ہوئیں۔ عینی شاہدین کے مطابق جنگی مشقوں کے دوران زور دار دھماکوں کی آوازیں سنائی دیتی رہی ہیں۔ اس کے علاوہ عینی شاہدین نے اسرائیلی فوج کے زیراستعمال جنگی کشتیاں اور آبدوزیں بھی سمندر میں اترتے دیکھی گئی ہیں۔
ذرائع کا کہنا ہے کہ غزہ کے قریب مشقوں کے مخصوص علاقے میں ساحل پر تین کلو میٹر تک شہریوں کےجانے پر پابندی عائد کر دی گئی ہے۔ اس کے علاوہ سمندر میں فلسطینی ماہی گیروں کو تلاش معاش کے لیے سمندر میں اترنے سے منع کیا گیا ہے۔
مبصرین کا خیال ہے کہ اسرائیلی بحریہ کی جنگی مشقیں غزہ کی پٹی میں فلسطینی مزاحمت کاروں کے خلاف کسی سخت کارروائی کےتناظر میں بھی ہو سکتی ہیں کیونکہ صہیونی فوج اور حکومت حالیہ کچھ عرصے میں غزہ کی پٹی میں کسی بڑی جنگ کے مسلط کرنے کی دھمکیاں دیتی رہی ہے۔