اسرائیلی وزیردفاع موشے یعلون نے مقبوضہ مغربی کنارے کے جنوب میں قائم "گوش عتصیون” ہاؤسنگ سوسائٹی میں پچھلے سات سال کے سب سے بڑے توسیعی منصوبے کا اعلان کیا ہے۔
مرکز اطلاعات فلسطین کے مطابق وزارت دفاع کی جانب سے جاری ایک بیان میں کہا گیا ہے کہ وزیردفاع موشے یعلون نے گذشتہ ہفتے "گوش عتصیون” کے قریب 984 ایکڑ فلسطینی اراضی یہودی کالونیوں میں ضم کرنے کا حکم دیا ہے۔ یہ اراضی مغربی بیت لحم اور مغربی کنارے کے دوسرے شہروں سے لی جائے گی۔یہ توسیعی منصوبہ ایک ایسے وقت میں شروع کیا گیا ہے جب فلسطینی اتھارٹی اور اسرائیل کے درمیان نام نہاد امن مذاکرات کی تاریخ میں ایک بار پھر توسیع ہوگئی ہے۔ اسرائیل نے یقین دہانی کرائی ہے کہ امن مذاکرات کے دوران مقبوضہ عرب علاقوں میں یہودی بستیوں کی مزید تعمیر نہیں کی جائے گی۔