مقامی طبی ذرائع نے بتایا کہ جمعرات کو علی الصباح صہیونی فوج نے الزیتون کالونی میں دھات سازی کی ایک فیکٹری کو بمباری کا نشانہ بنایا جس کے نتیجے میں 65 سالہ الحاج حسن حسنین نامی شہری زخمی ہوا۔ گولہ باری سے حسنین کے مکان کا ایک حصہ بھی زمین بوس ہوگیا۔
خیال رہے کہ اسرائیلی فوج نے بدھ کے روز غزہ کے جنوبی اور مشرقی علاقوں پر زمینی اور فضائی حملے کیے تھے جن میں متعدد مکانات کو نقصان پہنچا تاہم کسی قسم کے جانی نقصان کی اطلاع نہیں ملی۔
عینی شاہدین نے بتایا کہ اسرائیلی فوجیوں نے مشرقی غزہ میں جبل الصورانی کے مقام پر ایک مکان ، الشجاعیہ اور الاھیا میں القسام بریگیڈ کے مراکز پربمباری کی۔ شمالی غزہ میں خالی زمین پرمیزائل داغے گئے جب کہ مشرقی غزہ میں التفاح کالونی اور لوہے کا سامان تیار کرنے والے ایک کارخانے کو نشانہ بنایا۔
فلسطینی مزاحمتی تنظیموں اسلامی تحریک مزاحمت ’’حماس‘‘ اسلامی جہاد اور القسام بریگیڈ کی جانب سے اسرائیلی فوج کے تازہ حملوں کو دشمن کی کھلی جارحیت قرار دیا ہے۔ فلسطینی تنظیموں نے دھمکی دی ہے کہ غزہ کی پٹی پرحملہ اسرائیل کو مہنگا پڑے گا اور اس کے خطرناک نتائج کی ذمہ داری اسرائیل پرعائد ہوگی۔