(روز نامہ قدس ۔آنلائن خبر رساں ادارہ ) یہ دھاوے ایک ایسے وقت میں بولے گئے جب فلسطینی شہری رمضان المبارک کے پہلے جمعہ کی نماز کی تیاری کررہے تھے اور دوسری جانب صہیونی آبادکاروں کے اشتعال انگیز جتھوں نے مسجد اقصیٰ کی بے حرمتی شروع کی۔
فلسطینی ذرائع کے مطابق گذشتہ روز رمضان المبارک کے پہلے جمعہ کے موقع پر غیر قانونی صہیونی آبادکاروں کی بڑی تعداد نے اسرائیلی سیکیورٹی فورسز کے حفاظتی حصارمیں مسجد اقصیٰ پر اس وقت دھاوا بولاجب فلسطینی شہری نماز جمعہ کی ادائیگی کے لئے قبلہ اول میں جمع ہورہے تھے۔
شرپسند صہیونی آبادکاروں نے یہودی مذہبی رسومات کی ادائیگی کے نام پر قبلہ اول پر دھاوا بولا اور قابض فوج کی موجودگی میں آباد کاروں نے تلمودی تعلیمات کےمطابق مذہبی رسومات ادا کیں۔قابض فوج کے گھیراؤ سے قبل فلسطینیوں کی بڑی تعداد قبلہ اول میں موجود تھی۔ انہوں نے اسرائیلی فوج کے خلاف شدید نعرے بازی کی۔ فلسطینی نمازیوں کے’اللہ اکبر‘ کے فلک شگاف نعروں سے قبلہ اول کی فضا گونج اٹھی۔
اس دوران فلسطینی نوجوانوں نے قابض فوج پر سنگ باری کی جب کہ دوسری طرف سے قابض فوجیوں نے فلسطینی نمازیوں کو قبلہ اول سے باہر نکالنےکے لیے ان پر طاقت کا استعمال کیا اور ان پر آنسو گیس کی شیلنگ کے ساتھ ربڑ کی گولیاں چلائیں جس سے متعدد نمازی زخمی ہوگئے۔