(روز نامہ قدس ۔آنلائن خبر رساں ادارہ ) صیہونی چوکی پر حملہ ایسے وقت میں ہوا ہے کہ جب فلسطینیوں کے ساتھ صیہونی ریاست کے سنگین جرائم جاری ہیں۔
غیر قانونی صیہونی ریاست اسرائیل کے مظالم کے خلاف برسرپیکار اسلامی مزاحمتی تحریک حماس کے ترجمان عبدالطیف القانوع نے مقبوضہ غرب اردن کے شہر نابلس میں صیہونی فوج کی زعترہ چوکی پر فلسطینی جانباز کے حملے کو فلسطینیوں کے خلاف صیہونی ریاستی دہشتگردی اور فلسطینی عوام اور مقدسات کے خلاف قابض صہیونی ریاست کی جارحیت کا ردعمل قراردیتے ہوئے اس کارروائی کو سراہا ہے۔
اپنے جاری بیان میں انھوں نے کہا کہ یہ آپریشن ایک ایسے وقت میں ہوا ہے کہ جب صہیونی جیلوں میں فلسطینی اسیران کے خلاف اسرائیلی جارحیت کا سلسلہ جاری ہے۔ زعترہ چوکی پر کارروائی مزاحمت کاروں کی فلسطینیوں قیدیوں کے دفاع اور اس کے مظالم کا جواب دینے کی صلاحیت کی عکاسی کرتی ہے۔
ہم اپنے بہادر اسیران کو یقین دلاتے ہیں مزاحمت کار اسرائیلی جیلروں کے خلاف جنگ میں ان کے ساتھ ہیں اور ان کے دفاع کی ذمہ داری سے کبھی دستبردار نہیں ہوں گے۔
انہوں نے یہ بات زور دے کر کہی کہ "مزاحمت کار اسرائیلی جیلوں سے فلسطینی اسیران کو آزاد کرانے کے لیے پر عزم ہیں”۔