(روز نامہ قدس ۔آنلائن خبر رساں ادارہ ) 42 سالہ فلسطینی کو غاصب فوج نے سینےمیں گولی ماری، زخمی نوجوان کو فوری طور ترکی اسپتال منتقل کیا گیا تاہم وہ جانبر نا ہوسکا۔
فلسطینی ذرائع ابلاغ کےمطابق غیر قانونی صیہونی ریاست اسرائیل کی نام نہاد فوج نے جمعرات کی صبح مقبوضہ مغربی کنارے کے علاقے طوباس میں الفارعہ کیمپ پر دھاوا بولا، فلسطینیوں کے گھروں کی تلاشی کے دوران مکینوں کو تشدد کانشانہ بنایا اور روایتی لوٹ مار کی جس کے خلاف فلسطینی نوجوانوں نے مزاحمت کی اور پرتشدد جھڑپیں شروع ہوگئیں۔مزاحمتی کارکنوں نے کیمپ میں موجود دھماکہ خیز آلات سے قابض فوج کو نشانہ بنایا۔مزاحمت کاروں نے ایک فوجی بلڈوزر اور ایک "بوز نمر”ماڈل کی فوجی گاڑی کو دھماکے سے نشانہ بنایا۔
صیہونی فوج نے اس دوران 42 سالہ سفیان جواد عبدالجواد کے سینے میں گولی جس سے وہ شدید زخمی ہوا جس کو فوری طورپر طوباس سے ترکی اسپتال منتقل کیا گیا تاہم وہ زخموں کی تاب نہ لاتے ہوئے دم توڑ گیا۔
واضح رہے کہ 28 اگست سے غاصب صیہونی افواج نے مغربی کنارے اور اس کے مختلف علاقوں بالخصوص طولکرم، جنین اور طوباس کی گورنریوں کے خلاف فوجی جارحیت شروع کی جس کے نتیجے میں اب تک 6 بچوں اور 2 بزرگ شہریوں سمیت 48 فلسطینی شہید ہوچکے ہیں۔