(روز نامہ قدس ۔آنلائن خبر رساں ادارہ ) صیہونی فوج کے ساتھ فلسطینی مزاحمت کاروں کی پرتشدد جھڑپیں جاری ہیں جس میں گذشتہ روز ایک نوجوان کی شہادت کی تصدیق کی گئی ہے۔
فلسطینی وزارت صحت کی جانب سے جاری کردہ بیان میں بتایا گیا ہے کہ فلسطین پر قابض غیر قانونی صیہونی ریاست اسرائیل کی نام نہاد سیکیورٹی فورسز نے گذشتہ سات اکتوبر سے اب تک جہاں غزہ میں فلسطینیوں کی نسل کشی کا سلسلہ جاری رکھا ہواہے وہیں مقبوضہ مغربی کنارے میں بھی فلسطینیوں ریاستی دہشتگردی جاری رکھی ہوئی ہے ۔
بیان میں بتایاگیا ہے کہ مزاحمتی تحریک حماس کی جانب سے صیہونی ریاست کے خلاف شروع کئے گئے آپریشن طوفان الاقصیٰ کے آغاز سے اب تک اسرائیلی فوج نے مغربی کنارے میں 288 فلسطینیوں کو شہید کردیا ہے۔
بیان میں بتایا گیا ہے کہ گذشتہ روز صیہونی فوج نے نابلس سے تعلق رکھنے والے 30 سالہ فلسطینی حمزہ ابراہیم محمد بشکرکو نابلس کے جنوب میں واقع قصبے حووارہ کے قریب گولیاں مار کر شہید کردیا جس کے بعد مغربی کنارہ میں شہید فلسطینیوں کی تعداد 288 ہوگئی ہے۔