(روز نامہ قدس ۔آنلائن خبر رساں ادارہ)القسام کے جانبازوں کا صیہونی ریاست پر کیا جانے والا حملہ دور جدید کا سب سے کامیاب کمانڈو آپریشن تھا جس میں دشمن کو ذلت آمیز شکست ہوئی۔
سات اکتوبر کو غیر قانونی صیہونی ریاست اسرائیل کے خلاف طوفان الاقصیٰ آپریشن کو ایک سال مکمل ہونے پر فلسطینی مزاحمتی تحریک حماس کے سیاسی ونگ القسام بریگیڈ کے ترجمان ابو عبیدہ نے اپنے جاری کردہ بیان میں صیہونی ریاست کو ذلت آمیز شکست دینے کے عزم کا اظہارکرتے ہوئے کہا ہے ہم نے غاصب صیہونی دشمن کے خلاف طویل جنگ لڑنے کا انتخاب کیا ہے جو صیہونی دشمن کے لیے تکلیف دہ اور مہنگی ثابت ہوگی۔
انھوں نے طوفان الاقصیٰ کا ایک سال مکمل ہونے پر الجزیرہ پر نشر ہونے والے ویڈیو بیان میں کہا کہ ہم نے طوفان الاقصیٰ تب شروع کیا جب مسجد اقصیٰ کی سلامتی انتہائی خطرناک مرحلے پر پہنچ گئی تھی۔
ابو عبیدہ نے کہا کہ اسرائیل غزہ میں ایک بڑے حملے کی منصوبہ بندی کررہا تھا لیکن طوفان الاقصیٰ کے ذریعے ہم دشمن پر پہلے ہی حملہ آور ہوگئے، یہ دور جدید کا سب سے کامیاب کمانڈو آپریشن تھا جس میں دشمن کو ذلت آمیز شکست ہوئی۔
انہوں نے مزید کہا کہ غزہ میں موجود اسرائیلی یرغمالیوں کو طویل عرصے تک قید رکھا جا سکتا ہے اور انکی قسمت اسرائیلی حکومت کے اقدامات سے منسلک ہے، غزہ میں جنگ جتنی دیر جاری رہے گی یرغمالیوں کے لیے اتنا ہی زیادہ خطرہ ہوگا۔
ترجمان کا مزید کہنا ہے کہ 7 اکتوبر کا حملہ مسجد اقصیٰ کے احاطے میں اسرائیلی مبینہ خلاف ورزیوں، بستیوں کی توسیع، فلسطینی سکیورٹی قیدیوں کے ساتھ بدسلوکی اور غزہ کی پٹی کی ناکہ بندی کا ردعمل تھا۔
ابو عبیدہ نےحزب اللہ کو مخاطب کرتے ہوئے کہا کہ ہمیں آپ کی ثابت قدمی اور جرات پر یقین ہے کہ آپ صہیونی دشمن کو بھاری نقصان پہنچانے میں کامیاب ہوں گے۔