(روز نامہ قدس ۔آنلائن خبر رساں ادارہ ) غیر قانونی صیہونی آبادکاروں کے قتل میں ملوث فلسطینیوں کو دہشت گرد قرار دے کرانہیں سزائے موت دینے کے بل پرآج کے رائے شماری کی جائے گی۔
فلسطین پر قابض غیر قانونی صیہونی ریاست اسرائیل کے معروف عبرانی اخباریدیعوت احرونوت نے اپنی رپورٹ میں انکشاف کیا ہے کہ آج صیہونی ریاست کی پارلیمنٹ (کینسٹ) میں کئی نئے قوانین پر ووٹنگ کرانے کی تیاری کی جارہی ہے جو اسرائیل کی وزارتی کمیٹی برائے قانون سازی کے امور کی منظوری کے بعد سامنے آئی ہے جس میں 26 فروری کو اسرائیلی اہداف کے خلاف کارروائیاں کرنے والوں کو سزائے موت دینے کے قانون کی منظوری دی گئی تھی آج اس قانون پر رائے شماری کی جائے گی۔اس کے علاوہ عدالتی ترامیم کے مجوزہ قانون پربھی آج ہی رائے شماری کی جائے گی۔
رپورٹ میں بتایا گیا ہے کہ اس قانون کو پاس کرنے کے بعد”عدالت نئے قانون کے تحت صیہونی ریاست کے شہریوں کے خلاف قومی بنیادوں پر قتل کے جرم کے مرتکب افراد کو سزائے موت دے سکے گی”۔
اخبار نے مزید کہا کہ وزارتی کمیٹی برائے قانون سازی نے فیصلہ کیا ہے کہ بل کنیسٹ میں پیش کرنے سے پہلے اس کے فارمولے کے بارے میں سکیورٹی کابینہ میں بحث کا اجلاس منعقد کیا جائے۔ اقوام متحدہ کے ماہرین نے عسکری کارروائیوں کے جواب میں اسرائیل کی طرف سے فلسطینیوں کے خلاف سزائے موت کی بحالی کے بارے میں خبردار کیا ہے۔