(روز نامہ قدس ۔آنلائن خبر رساں ادارہ ) صہیونی ریاست کے وزیر خارجہ نے مستقبل میں سعودی عرب کے دورے کا امکان ظاہر کرتے ہوئے کہا کہ سعودی عرب کا دورہ ٹیبل پر ہے، ابھی تاریخ طے نہیں ہوئی۔
غیر قانونی صہیونی ریاست اسرائیل کے فوجی ریڈیو کو دیئے گئے انٹرو یو میں صہیونی ریاست کے وزیرخارجہ ایلی کوہن نے آئندہ چند ہفتوں میں سعودی عرب کے دورے کے حوالے سے بات کرتے ہوئے کہا ہے کہ سعودی عرب کا دورہ ٹیبل پر ہے، ابھی تاریخ طے نہیں ہوئی، انھوں نے عرب ملک کا نام لئے بغیر بتایا کہ رواں سال ایک اور عرب ملک اسرائیل کے ساتھ تعلقات معمول پر لائے گا۔
ایلی کوہن کا کہنا تھا کہ امریکی سینیٹر لنزے گراہم کی سعودی ولی عہد شہزادہ محمد بن سلمان سے ملاقات میں سعودی اسرائیل تعلقات پر بات ہوئی تھی جس میں انھوں نے چین کی ثالثی سے سعودی ایران معاہدوں پر تشویش کا اظہار کیا۔
اسرائیلی وزیرخارجہ نے کہا کہ سعودی عرب کا دشمن یقینی طور پر اسرائیل نہیں ایران ہے، تاہم سعودی ایران تعلقات میں پیش رفت اسرائیل کے لیے خوش آئند ہو سکتی ہے۔ ایلی کوہن کا کہنا تھا کہ سعودی ایران تعلقات، سعودی عرب کے اسرائیل کے قریب آنے کا باعث بن سکتے ہیں۔
ایلی کوہن نے کہا ہے کہ کہ ہم چین کا احترام کرتے ہیں اور چین کے ساتھ بہت ڈیل کرتے ہیں۔ لیکن ہم یہ بھی جانتے ہیں کہ ہمارا اپنے عظیم دوست امریکا کے ساتھ ناگزیر اتحاد ہے۔ چینی وزیرخارجہ نے اسی ہفتے کہا تھا کہ انہوں نے اپنے فلسطینی اوراسرائیلی ہم منصبوں کو امن مذاکرات میں سہولت کاری کے لیے بیجنگ کی آمادگی سے آگاہ کیا ہے۔