غزہ میں طبی سہولیات کی کمی ہے، زخمیوں کو ہمیشہ کا آرام دینے کیلئے اسپتال پر بمباری کی، اسرائیلی سوشل میڈیا

(روز نامہ قدس ۔آنلائن خبر رساں ادارہ )  صیہونی وزیراعظم نے غزہ کے اسپتال پر بمباری کی خبروں کو مسترد کرتے ہوئے کہا ہے کہ اسپتال پر گرنےوالا میزائل اسرائیلی فضائیہ کا نہیں بلکہ فلسطینی تنظیم اسلامی جہاد کا راکٹ تھا۔

غیر قانونی صیہونی ریاست اسرائیل کی جانب سے غزہ میں سنگین جنگی جرائم کے  ارتکاب جاری ہیں گذشتہ شب  صیہونی فضائیہ نے الاہلی عرب اسپتال کودانستہ نشانہ بنایاجس میں 800 سے زائد خواتین اور بچوں سمیت اسپتال میں زیر علاج مریض اور زخمی شہید ہوئے، عالمی برادری کی ناراضی اور دباؤ پر اسرائیل کی جانب سے اسپتال پر حملے کی ذمہ داری قبول کرنے سے انکار کردیا گیا۔

اسرائیلی وزیر اعظم بن یامین نتن یاہو  نے غزہ کے اسپتال پر حملے سے متعلق دعویٰ کیا کہ اسپتال اسرائیلی بمباری کے بجائے اسلامی جہاد کے راکٹ کانشانہ بنا تاہم عالمی میڈیا نے اسرائیلی دعوے کو جھوٹا دعویٰ قرار دے دیا۔

دوسری جانب  سماجی رابطوں کی ویب سائٹ فیس بک پر اسرائیلی فوج کے حامی ایک اکاونٹ  سے کہا گیا ہے کہ غزہ میں  "طبی سازوسامان اور عملے کی کمی کی وجہ سے، ہم نے اسپتال پر فضائی حملہ کرکے مداخلت کرنے کا انتخاب کیا ہے تاکہ  فلسطینیوں کی  تکلیف کو کم سے کم کیا جاسکے۔”