(روز نامہ قدس ۔آنلائن خبر رساں ادارہ ) فلسطینیوں کے خلاف صہیونی فورسز کی دہشتگردانہ کارروائیاں مسلسل جاری ہیں ، گھروں میں لوٹ مار اور شہریوں کو تشدد کا نشانہ بنانا معمولی ہے۔
فلسطینی ذرائع کے مطابق غیر قانونی صہیونی ریاست اسرائیل کی نام نہاد سیکیورٹی فورسز نے گذشتہ روز مقبوضہ غرب اردن کے شمالی شہر جنین کے جنوب میں ایک فلسطینی نوجوان پر تیز رفتار فوجی جیپ چڑھادی جس کے نتیجے میں وہ شدید زخمی ہوگیا، جبکہ قابض فورسز نے جنین کیمپ سے دو نوجوانوں کو گرفتار کر لیا۔
طبی ذرائع نے اطلاع دی ہے کہ جنین کے جنوب میں قباطیہ اور زبابدہ کے قصبوں کے درمیان ایک فوجی گاڑی کے رن اوور کے نتیجے میں زخمی ہونےوالےنوجوان کو ابن سینا سپیشلسٹ ہسپتال لایا گیا ہے۔اسرائیلی قابض فوج نے بدھ کو جنین کیمپ سے دو نوجوانوں کو گرفتار کر لیا۔
مقامی ذرائع نے بتایا کہ قابض فوج نے نوجوان ہانی عطا ابو رمیلہ کو جنین کے جنوب میں زبابدہ قصبے کے قریب اچانک فوجی چوکی سے گرفتار کیا اور نوجوان اسامہ زید صلاح کو اس وقت گرفتار کیا جب وہ قریب ایک فوجی چوکی سے گزر رہا تھا۔اس کے علاوہ آج بدھ کو قابض اور اس کے آباد کاروں نے مغربی کنارے کے الگ الگ علاقوں میں شہریوں اور ان کی زمینوں کے خلاف حملے اور خلاف ورزیاں کیں۔بیت لحم میں آباد کاروں نے "الشعف” کی زمینوں پر تقریباً 100 پھل دار پودو کو اکھاڑ پھینکا۔