(روز نامہ قدس ۔آنلائن خبر رساں ادارہ ) غاصب فورسز نے جنین ، نابلس، الخلیل ، اریحا،اور بیت المقدس کے متعدد قصبوں اور علاقوں میں چھاپہ مارکارروائیاں رات بھر جاری رکھیں۔
ذرائع نے بتایا کہ غاصب صہیونی فورسز نے نصف شب کے بعد مقبوضہ بیت المقدس اور مقبوضہ غرب اردن کے متعدد قصبوں اور علاقوں پر دھاوا بولا جس کے بعد فلسطینی نوجوانوں اور قابض فوج میں پرتشدد جھڑپیں شروع ہوئیں۔ اسی دوران اسرائیلی فورسز نے اریحا میں عقبہ جبر کیمپ اور طوباس میں گرفتاریوں کی مہم شروع کی۔
شمالی مغربی کنارے میں طولکرم پناہ گزین کیمپ میں کارکنوں اور اسرائیلی فورسز کے درمیان مسلح جھڑپیں بھی ہوئیں جبکہ صہیونی آبادکاروں نے رام اللہ کے مشرق میں واقع قصبے دیر دبوان پر حملہ کیا جس میں متعدد شہری زخمی ہو گئے۔
فلسطینی میڈیا نے منگل کی شام کو اطلاع دی ہے کہ مغربی کنارے میں جنین کے جنوب میں واقع قصبے قبطیہ پر حملہ کرنے کے دوران فلسطینی کارکنوں اور اسرائیلی فورسز کے درمیان جھڑپیں ہوئیں۔
فلسطینی کارکنوں نے قبطیہ قصبے میں صہیوی فورسز پر دیسی ساختہ دھماکہ خیز مواد سے حملہ کیا۔ اس دوران زور دار دھماکوں کی آوازیں سنی گئیں۔