(روز نامہ قدس ۔آنلائن خبر رساں ادارہ )کویت کا کہنا ہے کہ مسئلہ فلسطینی پوری مسلم امہ اور عرب اقوام کا مرکزی مسئلہ ہے اور اس مسئلے کے منصفانہ حل تک صہیونی ریاست کے ساتھ نارمل تعلقات قائم نہیں ہوسکتے۔
امریکہ کی سرپرستی میں سعودی عرب سمیت دیگر اسلامی ممالک کے غیر قانونی صیہونی ریاست اسرائیل کے ساتھ تعلقات معمول پر لانے کی کوششوں کی خبروں کے تناظر میں ایک بار پھر کویت فلسطینیوں کے حق میں مستند عرب موقف اختیار کرتے ہوئے فلسطینی قوم کے حق خود ارادیت کی مکمل حمایت کی ہے۔
کویتی وزیر صحت احمد العوادی نے اقوام متحدہ کی جنرل اسمبلی کے اجلاس کے بعد وزرا صحت کے اجلاس میں صیہونی ریاست کے وزیر صحت اور وزیر داخلہ کی موجودگی پر سخت اعتراض کرتےہوئے منعقد ہونے والی وزرائے صحت کی کانفرنس کا بائیکاٹ کیا۔
انھوں نے کہا گیا ہے کہ فلسطینی قوم کی نصرت اور اس کی آزادی تک صہیونی ریاست کےساتھ تعلقات معمول پرنہیں لائے جا سکتے۔ مسئلہ فلسطین پوری مسلم امہ اور عرب اقوام کا مرکزی مسئلہ ہے اور اس مسئلے کے منصفانہ حل تک صہیونی ریاست کے ساتھ نارمل تعلقات قائم نہیں ہوسکتے۔
غیر ملکی خبر رساں اداروں کی رپورٹ کے مطابق کویتی وزیر صحت امریکی ریاست نیو یارک میں غیر قانونی صیہونی ریاست اسرائیل کے وزیر کی تقریر شروع ہونے سے پہلے اجلاس کا بائیکاٹ کرتےہوئے ہال سے باہر نکل گئے۔