غزہ میں یرغمال صیہونی فوجیوں اور آبادکاروں کی تعداد اسرائیل کی سوچ سے بھی زیادہ ہے، زیاد النخالہ

(روز نامہ قدس ۔آنلائن خبر رساں ادارہ )صیہونی دشمن حکومت کو یہ حقیقت قبول کرلینا چاہئے کہ ہلاکتوں اور قیدیوں کی تعداد بڑھنے کی روک تھام کا واحد راستہ شکست تسلیم کرنا ہے۔

مقبوضہ فلسطین میں صیہونی جرائم کے خلاف برسرپیکار مزاحمتی تحریک جہاد اسلامی فلسطین کے سربراہ زیاد النخالہ نے  غزہ پر جاری صیہونی افواج کی وحشیانہ بمباری  پرجاری بیان میں کہا ہے کہ غزہ میں یرغمال بنائے گئے  صیہونی فوجیوں اور آبادکاروں کی تعداد اسرائیل کی سوچ سے بھی زیادہ ہے، طوفان الاقصی نے دشمن کو مفلوج اور اس کی کمزوری کو آشکارا کردیا ہے ۔

انہوں نے استقامتی محاذ کے سپاہیوں کو مخاطب کرکے کہا کہ آپ نے دشوار ترین حالات میں دنیا کی توجہ اپنے آپ پر مرکوز کی اور اہم ترین خبریں پیش کیں، کیونکہ آپ کے پاس عزم و ارادہ تھا اور آپ نے سر تا پا مسلح دشمن کو ذلیل و خار کردیا ۔

انہوں نے مزید کہا کہ غیرقانونی صیہونی کالونیوں تک پہنچنے والی جنگ، ان کے فوجی کیمپوں پر حملے، اسلحے چھوڑ کر ان کا فرار اور بڑی تعداد میں صیہونی فوجیوں کی گرفتاری، یہ سب ثابت کرتے ہیں کہ صیہونی حکومت کی فوج اس سے بہت کمزور ہے جو دنیا میں بہت سے سمجھتے ہیں۔

زیاد النخالہ نے اپنے بیان کے آخر میں کہا ہے کہ فتح نزدیک ہے، ہم جنگ کریں گے، مجاہدت جاری رکھیں گے اور اپنے عزم اور فداکاریوں سے طاقت کا توازن تبدیل کردیں گے۔