(روز نامہ قدس ۔آنلائن خبر رساں ادارہ ) اسرائیلی میڈیا کا کہنا ہے کہ صیہونی فوج اسرائیلی جرائم کو دنیا کی نظروں سے چھپانے کیلئے سیاسی قیادت سے زیادہ چالاکی کا مظاہرہ کررہی ہے۔
غیر قانونی صیہونی ریاست اسرائیل کے نیوز چینل 13کا دعویٰ ہے کہ توقع ہے کہ بین الاقوامی فوجداری عدالت آئندہ 10دن کے دوران صیہونی وزیراعظم بینجمن نیتن یاہو اور وزیر دفاع گیلنٹ کے وارنٹ گرفتاری کے بارے میں اپنا فیصلہ جاری کرے گی۔
رپورٹ میں بتایا گیا ہے کہ بین الاقوامی فوجداری عدالت کی جانب سے غیر معمولی فیصلہ نیتن یاہو سمیت اسرائیلی سیاسی قیادت کے لئے انتہائی تشویش کا باعث ہے، اور وہ اس متوقع فیصلے کو روکنے کیلئے عالمی سطح پر کوششیں کررہے ہیں ۔
دوسری جانب غاصب صیہونی فوج اسرائیلی جرائم کو چھپانے کیلئے سیاسی قیادت سے زیادہ اقدامات کرنے کی کوشش کررہی ہے، میڈیا کا کہنا ہے کہ صیہونی افواج نے عالمی فوجداری عدالت کی جانب سے متوقع فیصلے سے اسرائیل کو پہنچنے والے نقصان کو کم کرنے کے لیے سفارشات پیش کیں، جس میں غزہ میں اسپتالوں کا قیام اور انسانی ہمدردی کی راہداری کھولنا شامل ہے۔
اسرائیلی براڈکاسٹنگ کارپوریشن نے بھی اپنی رپورٹ میں بتایا ہے کہ سیاسی قیادت نے دو ہفتے قبل انسانی امداد کا دائرہ وسیع کرنے پر اتفاق کیا تھا جس کا مقصد اسرائیلی جرائم کو عالمی سطح پرچھپانے کی کوشش ہے۔