(روز نامہ قدس ۔آنلائن خبر رساں ادارہ ) چند دنوں کے دوران غاصب صیہونی فوج کا امداد کےمنتظر نہتے فلسطینیوں پر حملے کا یہ چوتھا واقع ہے ۔
فلسطینی ذرائع کے مطابق مقبوضہ فلسطین کے محصور شہر غزہ کے جنوب میں امدادی ٹرکوں کے منتظر بھوک اور پیاس سے بے حال نہتے فلسطینی شہریوں پر صہیونی فوج نے ایک بار پھر حملہ کیا، جس میں خواتین سمیت میں 9 فلسطینی شہری شہید جبکہ دیگر متعدد زخمی ہوگئے جن کو طبی امداد کے لیے الشفا اسپتال منتقل کیا گیا۔
یہ اسرائیلی فوج کی جانب سے گزشتہ چند دن کے دوران امداد کے منتظر افراد پر اس طرح کا چوتھا حملہ ہے۔
خیال رہے کہ غزہ سٹی کے شہریوں کے لیے امداد کی فراہمی کو صہیونی فوج نے لگ بھگ منقطع کر دیا ہے اور رفح سے بہت کم ٹرک وہاں امداد لے کر پہنچتے ہیں۔ شمالی غزہ میں شدید غذائی قلت سے اب تک کم از کم 27 بچے شہید ہوچکے ہیں۔ وسطی غزہ کے شہر دیر البلح میں بھی اسرائیلی فوج نے ایک شہری کے گھر پر حملہ کیا جس کے نتیجے میں 8 فلسطینی شہید ہوگئے۔ رپورٹس کے مطابق گھر کے ملبے تلے متعدد افراد موجود ہیں جن کو نکالنے کے لیے کام کیا جا رہا ہے۔ 7 اکتوبر سے اب تک اسرائیلی حملوں میں 31 ہزار 45 فلسطینی شہید ہو چکے ہیں جبکہ 72 ہزار سے زائد زخمی ہوئے۔