(روز نامہ قدس ۔آنلائن خبر رساں ادارہ ) مظاہرین نےہاتھوں میں اسرائیلی پرچم اٹھا رکھے تھے اورنیتن یاہو کے خلاف ڈھول، باجوں کے ساتھ جمہوریت کے نعرے لگائے۔
عالمی نشریاتی ادارے کی جاری کردہ رپورٹ کے مطابق گذشتہ روز مقبوضہ فلسطین پر قابض صہیونی ریاست اسرائیل کے دارالحکومت تل ابیب سمیت ملک بھر میں وزیر اعظم بنیامن نیتن یا ہوکی قیادت کے خلاف احتجاجی مظاہرے39ویں ہفتے میں داخل ہو گئے ۔
رپورٹ کے مطابق صہیونی وزیر اعظم نیتن یاہو اسرائیل کے ناپسندیدہ وزیر اعظم ثابت ہوئے ہیں جن کے خلاف اسرائیلی عوام ہر ہفتےبڑے پیمانے پر سڑکوں پر جمع ہوکر احتجاج کا سلسلہ جاری رکھے ہوئے ہیں۔
گذشتہ روز بھی صہیونی وزیر اعظم کے خلاف سب سے بڑا مظاہرہ تل ابیب میں کاپلان شاہراہ سے حکومتی کمپلیکس تک عوام نے مارچ کی اور نیتن یاہو کی زیرِ قیادت انتہائی دائیں بازو کی اتحادی حکومت کی عدالتی اصلاحات کے خلاف احتجاج کیا۔
مظاہرین نے اسرائیلی پرچم اٹھا رکھے تھے اور انہوں نے ڈھول باجوں کے ساتھ "جمہوریت” کے نعرے لگائےجبکہ تل ابیب کی مرکزی آیالون موٹر وے کوبھی کچھ دیر کے لئےمظاہرین نے ٹریفک کے لئے بند کر دیا جس کے باعث اسرائیلی پولیس نے 2 مظاہرین کو حراست میں لے لیا اور 7 کو جرمانے کی سزا بھی سُنائی ہے۔
خیال رہے کہ صہیونی ریاست اسرائیل میں بن یامین نیتن یاہو کی عدالتی اصلاحات کے خلاف، ملک گیر احتجاجی تحریک کا سلسلہ شروع ہوئے تقریباً 10 ماہ کا عرصہ گزر چُکا ہے۔