اسپین کا صیہونی ریاست کو اسلحہ فروخت پر پابندی کا اعلان

(روز نامہ قدس ۔آنلائن خبر رساں ادارہ ) میڈرڈ نے گزشتہ سال وینزویلا، مصر اور یوکرین پر اسی طرح کی پابندی کا اطلاق کیا ہے، گذشتہ سال اسپین نے اسرائیل کو 4.9 ملین یورو کا فوجی سازوسامان اور ٹیکنالوجی فروخت کی۔

ہسپانوی  نائب وزیراعظم یولندہ دیاز نے غزہ میں غیر قانونی صیہونی ریاست اسرائیل کے ہاتھوں مقبوضہ فلسطین کے محصور شہر غزہ میں سنگین جنگی جرائم اور خواتین و بچوں سمیت نہتے شہریوں کے قتل عام کے ردعمل میں  صیہونی ریاست کو جنگی اسلحہ کی فروخت پر پابندی عائد کردی ہے ۔

میڈرڈ میں میڈیا کے سوالات کا جواب دیتے ہوئے انھوں نے کہا کہ اسرائیل پر معاشی پابندیاں لگائی جائیں گی، اسرائیل کو غزہ کے معصوم بچوں اور خواتین کا قتل عام بند کرنا ہو گا۔

انھوں نے کہا کہ صیہونی ریاست کو  اسلحے کی فروخت روک دی جائے گی اور سفارتی دباؤ بڑھایا جائے گا تاکہ غزہ میں فلسطینیوں کے قتل عام  کوروکا جائے اور اسرائیل جنگ بندی پر مجبور ہو ۔