(روزنامہ قدس ۔آن لائن خبر رساں ادارہ) صہیونی لیڈر نے محلے کے فلسطینی مکینوں کو دھمکیاں دیں اورالشیخ جراح کے فلسطینی سالم خاندان کی ملکیت ان کے آبائی گھر پرقائم اپنے عارضی دفتر کا دورہ کیا۔
ذرائع کے مطابق گذشتہ روز مقبوضہ بیت المقدس میں درجنوں صہیونی آباد کاروں کے جھنڈ میں قابض ریاست اسرائیل کے رکن پارلیمنٹ اور انتہائی دائیں بازو کی صہیونی جماعت کے لیڈر ایتمار بن گویر نے الشیخ جراح محلے پر دھاوا بول دیا، علاقے میں گھس کر فلسطینیوں کے خلاف نعرے بازی کی اور انہیں مشتعل کر نے کے لیےہتک آمیز فقرے کسے۔
قابض فوج نے ماہ فروری میں سالم خاندان کو ان کے مکان سے جبری طور پربے دخل کر دیا تھا جس کے نتیجے میں گھر کے مالک نےاحتجاجی خود سوزی کی کوشش کی جس کے نتیجے میں قابض فوج نے انہیں جیل میں بھی ڈال دیا تھابعد ازاں ایتمار گویر نے فسادات کو مزید ہوا دینے کیلیے اسی مقام کو چنا اور ایک عارضی دفتر کا قیام عمل میں لایا گیا ہے۔
اس موقع پر اسرائیلی قابض پولیس نےایتماربن گویراور اس کے اتحادی صہیونی آباد کاروں کوتحفظ فراہم کیا اور فلسطینیوں کو تشدد کا نشانہ بنایا جس کے نتیجے میں مزاحمت کے الزام میں درجنوں فلسطینی نوجوان گرفتار کر لیے گئے۔
واضح رہے کہ گذشتہ سال کئی فلسطینی خاندانوں کو صہیونی آبادکار گروپوں کی جانب سے بے دخلی کا سامنا کرنے کے بعد الشیخ جراح میں پیدا ہونے والی کشیدگی غزہ کی پٹی پر اسرائیل اور مسلح گروپوں کے درمیان جنگ کا سبب بنی تھی۔