(روز نامہ قدس ۔آنلائن خبر رساں ادارہ) غزہ اور لبنا میں غیر قانونی صیہونی ریاست اسرائیل کی امریکی اور مغربی ممالک کی مدد سے جاری نسل کشی کی کارروائیوں کے خلاف لاکھوں یمنیوں نے مظلوم فلسطینیوں اور لبنانیوں کے ساتھ اظہار یکجہتی کی۔
گذشتہ روز یمن کے دارلحکومت صنعا، صعدہ، حجہ، الجوف، ذمار، المحویت، ریمہ اور اب اور البیضاء ، تعز، الذھل، لحج، الحدیدہ سمیت حوثی فورسز کے زیر کنٹرول متعدد دیگر گورنریوں میں وسیع تر احتجاجی مظاہرے منعقد کئے گئے جس میں شہریوں نے غزہ اور لبنان کے ساتھ اظہار یکجہتی کرتے ہوئے جلوس اور ریلیاں نکالیں، ریلیوں میں فلسطینی اور لبنانی عوام کی منظم نسل کشی کے خلاف شدید نعرے بازی کی گئی اور مقررین نے خطابات کیے۔ "ہم کسی بھی امریکی صیہونی دہشت گردی کے خلاف تیار ہیں” کے عنوان سے ریلیاں نکالی گئیں ریلیوں میں مظاہرین نے یمن، فلسطین اور لبنان کے جھنڈے اور حماس اور حزب اللہ کے رہ نماؤں کی تصویریں اٹھا رکھی تھیں۔
مظاہرین نے فلسطین اور لبنان کے حق میں فلک شگاف نعرے لگائے اور مظلوم فلسطینیوں کو اپنی بھرپور حمایت کا یقین دلایا ۔