(روزنامہ قدس ۔آن لائن خبر رساں ادارہ) عرب لیگ نےاقوام متحدہ کی سلامتی کونسل پر سوال اٹھا تے ہوئےکہا کہ اقوام متحدہ اورعالمی اداروں کی اخلاقی ذمہ داری ہے کہ فلسطین کو آزاد کرائے۔
عالمی ذرائع ابلاغ کے مطابق عرب لیگ کے جنرل سیکرٹریٹ کی جانب سے مقبوضہ فلسطین پر پانچ جون 1967ء کے غاصبانہ قبضے کے 55 سال پورے ہونے کی مناسبت سے نے سلامتی کونسل سے مطالبہ کیا گیا ہے کہ وہ قضیہ فلسطین کے حوالے سے اپنی ذمہ داریاں پوری کرے اورارض فلسطین پر اسرائیلی قبضہ ختم کرائے۔
عرب لیگ کے بیان میں کہا گیا ہے کہ اسرائیلی ریاست نے سنہ 1967ء کی چھ روزہ جنگ کے دوران فلسطینی علاقوں پر غیرقانونی طور پر قبضہ جمایا جسے عالمی برادری کسی صورت میں قبول نہیں کرتی اور یہ علاقے مستقبل میں وجود میں آنے والی آزاد فلسطینی ریاست کا حصہ ہیں تاہم سنہ 1967ء کی جنگ کے بعد پانچ دھائیاں بیت جانے کے باوجود فلسطینیوں کو ان کے علاقے واپس نہیں دلائے جاسکے۔
اقوام متحدہ کی سلامتی کونسل پر سوال اٹھا تے ہوئے عرب لیگ نے کہا کہ اقوام متحدہ اور عالمی اداروں کی اخلاقی ذمہ داری ہے کہ فلسطین کو آزاد کرائے، عالمی برادری اور اقوام متحدہ فلسطینی اراضی کو آزاد کرانے میں ناکام رہی ہے اور اسرائیلی ریاست نے غیرقانونی طور پرقبضے میں لیے فلسطینی علاقوں پر اپنا تسلط مزید مضبوط کرنے کے لیے مکروہ ہتھکنڈے استعمال کیے ہیں۔