عرب ملک تیونس سے فلسطینی محاصرہ زدہ شہر غزہ کی پٹی کے لیے ادویات اور دیگرسامان پر مشتمل امدادی قافلہ "الاحرار” اپنی منزل کی جانب روانہ ہو گیا ہے۔ امدادی قافلے میں چار ٹن ادویات اور دیگر طبی سامان شامل ہے۔
تیونس کے سرکاری ذرائع ابلاغ نے اطلاع دی ہے کہ امدادی قافلے کی قیادت معروف تیونسی سماجی کارکن فوج محمد علی بالحامہ کر رہی ہیں، جو امدادی سامان کے ہمراہ ہوائی جہاز کے ذریعے قاہرہ پہنچیں گی۔ قاہرہ سے یہ امدادی سامان ٹرکوں میں لاد کر رفح بارڈر سے غزہ کی پٹی لے جایا جائے گا۔ توقع ہے کہ امدادی قافلہ آج شام قاہرہ پہنچ جائے گا جہاں سے کل جمعہ کی شام اسے رفح بارڈر سے غزہ کی پٹی میں داخل کیا جائے گا۔
ادھر دوسری جانب فلسطینی ہلال احمر اور دیگر انسانی حقوق کی تنظیموں اور امدادی اداروں نے تیونس کے امدادی قافلے کے استقبال کی تیاریاں شروع کر دی ہیں۔
مرکز اطلاعات فلسطین کے مطابق تیونس میں "الاحرار” امدادی قافلے کی تیاری کا انتظام تیونس اسکاؤٹس یونین کی جانب سے کیا گیا ہے۔ قافلے کے ہمراہ تیونس کے اسکاؤٹس یونین کے اراکین سمیت ایک درجن امدادی کارکن غزہ آئیں گے۔