اسرائیلی ریڈیو نے اطلاع دی ہے کہ حال ہی میں فلسطینی مزاحمتی تنظیم "حماس” اور اسرائیل کے مابین طے پانے والی قیدیوں کی ڈیل کے مطابق قیدیوں کا جیلوں میں ایک جگہ سے دوسری جگہ منتقلی کا عمل جاری ہے۔ اتوار کو معاہدے کے ابتدائی مراحل کی تیاریوں کے سلسلے میں مختلف جیلوں کے فلسطینی اسیران کو یکجا کیا گیا۔
مرکز اطلاعات فلسطین کے مطابق صہیونی ریڈیو نے رہائی سے قبل تمام اسیران کو جنوبی فلسطین کی جیل”کتسیعوف” میں جمع کیا جائے گا، جہاں کچھ قیدیوں کو اتوار کے روز ھشارون اور کچھ دیگرجیلوں سے وہان منتقل کیا گیا۔ رپورٹ میں بتایا گیا ہے کہ تمام اسیران کی یکجائی کے بعد اسرائیلی جیل انتظامیہ اور انسانی حقوق کی عالمی تنظیم "ریڈکراس” کے طبی ماہرین تمام رہائی پانے والے تمام اسیران کا طبی معائنہ بھی کریں گے۔
درایں اثناء اسرائیلی حکومتی عہدیداروں نے اطلاع دی ہے کہ اسرائیلی وزیراعظم کی ہدایت پر ان تمام قیدیوں کی ایک فہرست صدر شمعون پیریز کو بھی ارسال کی گئی ہے جن کی سزاؤں کی معافی کا اختیار صرف صدر کے پاس ہے۔ وزیراعظم نے ان اسیران کی رہائی کی سفارش کر دی ہے اور فہرستوں پر اب صدر کے دستخط باقی ہیں۔ توقع ہے کہ آج صدر شمعون پیریزبھی فہرستوں پر دستخط کردیں گے۔
ادھر قاہرہ میں اسرائیلی اور مصری حکام کے مابین قیدیوں کے تبادلے کے طریقہ کار پرحتمی بات چیت کا عمل جاری ہے۔ اتوار کے روز اسرائیلی مذاکرات کار”ڈیوڈ میڈ اِن” نےمصری حکام سے بات چیت میں فلسطینیوں سے اپنے یرغمالی فوجی گیلاد شالیت اور فلسطینی اسیران کی رہائی کے طریقہ کار پربات چیت کی۔ توقع یہ کی جا رہی ہے کہ قیدیوں کےتبادلے کا پہلا مرحلہ منگل کو طے پا جائے گا۔