(روز نامہ قدس ۔آنلائن خبر رساں ادارہ ) مقبوضہ فلسطین میں اسرائیل کی غیر قانونی صیہونی بستیوں کی تعمیر کے خلاف ہونے والے پر امن احتجاج پر قابض فوجیوں نے فائرنگ کردی جس میں متعدد فلسطینی زخمی ہوگئے۔
فلسطین میڈیا ذرائع کا کہنا ہے کہ گذشتہ روز قابض فوج نے شمالی مقبوضہ مغربی کنارے میں نابلس کے مشرق میں بیت دجن نامی قصبے میں غیر قانونی صیہونی بستیوں کی تعمیرات کے خلاف نکالے جانے والے احتجاجی جلوس پر حملہ کیا جس کے نتیجے میں درجنوں فلسطینی زخمی ہوگئے۔
قابض فوج نے پر امن احتجاج کرنے والے مظاہرین کو منتشر کرنے کیلئے ربڑ کی گولیاں چلائی ، آنسو گیس کی شیلنگ کی اور ساؤنڈ بموں کا استعمال کیا فلسطینی ہلال احمر نے کہا ہے کہ اس کے امدادی کارکنوں نے 22 زخمیوں کو فوری طبی امداد فراہم کی جو ربڑ کی گولیاں لگنے سے زخمی ہوگئے تھے۔ اس کے علاوہ 75 سے زائد فلسطینی مظاہرین زہریلی آنسو گیس کی شیلنگ سے متاثر ہوئے۔
واضح رہے کہ نابلس میں مقامی کمیٹی نے غیر قانونی صیہونی بستیوں کی تعمیر اور فلسطینیوں کی زمینوں پر لوٹ مار کے خلاف ہفتہ وار مارچ میں شرکت کی اپیل کی تھی۔