(روز نامہ قدس ۔آنلائن خبر رساں ادارہ ) صیہونی ریاست اسرائیل فلسطینی عوام کے خلاف ہمہ گیر جنگ چھیڑ رہا ہے، غاصب افواج اور انتہا پسند صیہونی آباد کاروں کی مسلسل جارحیت ایک سنگین جنگی جرم ہے۔
فلسطینی ایوان صدر کے سرکاری ترجمان نبیل ابو رودینہ نے گذشتہ روز مقبوضہ مغربی کنارے کے شہر نابلس کے بلاطہ پناہ گزین کیمپ صیہونی فورسز کے حملے میں شہید ہونے والے تین فلسطینیوں کی شہادت پر اپنے سخت ردعمل میں کہا ہے کہ تینوں فلسطینیوں کی شہادت صیہونی ریاستی دہشتگردی کا تسلسل ہے ۔
ترجمان نبیل ابو رودینہ نے کہا کہ اسرائیل فلسطینی عوام کے خلاف ہمہ گیر جنگ چھیڑ رہا ہے۔انہوں نے صیہونی ریاست کی غاصب حکومت کو مکمل طور پر ذمہ دار ٹھہراتے ہوئے کہا کہ "نابلس شہر، اس کے دیہاتوں اور کیمپوں پر قابض افواج اور انتہا پسند آباد کاروں کی مسلسل جارحیت ایک سنگین جنگی جرم اور نہتے فلسطینیوں کیلئے اجتماعی سزا ہے جسے فوری طور پر ختم کیا جانا چاہیے۔
انہوں نے نشاندہی کی کہ ان جرائم پر امریکی انتظامیہ کی خاموشی نے اسرائیل کو اپنی جارحیت پر قائم رہنے کی ترغیب دی ہے، انھوں نے امریکہ سمیت عالمی برادری سے مطالبہ کیا کہ وہ فوری طور پر مداخلت کرے تاکہ "اسرائیلی پاگل پن کو روکا جائے جو خطے کو خوفناک جنگ میں جھونکنے کی کوشش کر رہا ہے۔
واضح رہے کہ غاصب صیہونی فورسز نے سال 2023 کے آغاز سے اب تک صرف نابلس میں 39 اور غزہ شہر میں 36 سمیت تمام مقبوضہ علاقوں میں خواتین اور بچوں سمیت 156 فلسطینیوں کو شہید کیاہے۔