(روز نامہ قدس ۔آنلائن خبر رساں ادارہ ) پوپ فرانسس نے کہا کہ مذاکرات ہی تمام مسائل کا حل ہیں ، تشدد دونوں کے مستقبل کو تباہ کر رہا ہے۔
غیر ملکی خبررساں ادارے کی رپورٹ کے مطابق عیسائیوں کے مذہبی پیشوا پوپ فرانسس نے سینٹ پیٹرز اسکوائر میں اتوار کو عبادت کے موقع پر خطاب کرتے ہوئے مقبوضہ بیت المقدس میں حالیہ دو بم حملوں اور مقبوضہ مغربی کنارے میں جھڑپوں کے بعد صیہونی ریاست اور فلسطینی حکام پر زور دیا کہ وہ بات چیت کے لیے زیادہ سے زیادہ کوششیں کریں۔
پوپ فرانسس نے اپنے خطاب میں کہا کہ تشدد دونوں کے مستقبل کو تباہ کر رہا ہے۔ پوپ نے دونوں واقعات کا تذکرہ کرتے ہوئے مقبوضہ بیت المقدس دھماکوں کو ناخوشگوار قرار دیتے ہوئے کہا کہ وہ گزشتہ چند مہینوں میں تشدد میں اضافے پر فکر مند ہیں۔
بدھ کو یروشلم کے مضافات میں بس اسٹاپ پر دو بم دھماکے ہوئے جس میں 16 سالہ لڑکا ہلاک اور کم از کم 14 افراد زخمی ہوئے جبکہ ہفتے کو ایک 50 سالہ شخص زخموں کی تاب نہ لاتے ہوئے دم توڑ گیا۔
منگل کو رات دیر گئے 16 سالہ فلسطینی لڑکے کو اسرائیلی فوج نے مقبوضہ مغربی کنارے کے شہر نابلس میں جھڑپوں کے دوران گولی مار کر شہید کر دیا تھا۔