(روز نامہ قدس ۔آنلائن خبر رساں ادارہ ) اسرائیلی شہروں پر غزہ سے میزائل داغے جانے کے بعد درجنوں مسلح مزاحمت کار یہودی بستیوں میں داخل ہونے میں کامیاب ہو گئے ہیں۔
آج علی الصبح مقبوضہ فلسطین کے محصور شہر غزہ سے غیر قانونی صیہونی ریاست اسرائیل پر آپریشن طوفان الاقصیٰ کے تحت درجنوں راکٹ داغے جانے کے بعد اسرائیلی فوج کے ترجمان ایوجا درعی نے سماجی رابطوں کی ویب سائٹ ’’ایکس‘‘ [سابق ٹوئٹر] اکاؤنٹ پر اپنے بیان میں اعتراف کرتے ہوئے کہا ہے کہ فلسطینی مزاحمت کاروں کی جانب سے اسرائیل پر داغے جانے والے راکٹوں سے اسرائیلی شہریوں میں شدید خوف و ہراس ہے۔
انھوں نے بتایا کہ القدس اور گرد ونواح میں خطرے کے سائرن بجائے جا رہے ہیں۔ انھوں نے اعلان میں بتایا کہ ’’غزہ سے اسرائیلی شہروں پر دسیوں راکٹ اور میزائل داغے جانے کے بعد درجنوں مسلح مزاحمت کار اسرائیلی یہودی بستیوں میں داخل ہونے میں کامیاب ہو گئے ہیں۔ غزہ کے اردگرد واقع یہودی بستیوں کے باسیوں کو ہدایت کی جاتی ہے کہ وہ اپنے گھروں میں ہی رہیں۔‘‘
دوسری جانب غزہ سے فلسطینی جنگجوؤں کی یہودی بستیوں میں دراندازی کی ویڈیو سوشل میڈیا پر وائرل ہو رہی ہیں۔ کئی ویڈیوز میں فلسطینی درانداز حریت پسندوں کی یہودی بستیوں میں اسرائیلی فوج کے ساتھ فائرنگ کے تبادلے کی ویڈیوز بھی شیئر کی جا رہی ہیں۔