(روز نامہ قدس ۔آنلائن خبر رساں ادارہ ) صیہونی افواج نے غزہ میں غیر معمولی نقصان کے باعث مقبوضہ مغربی کنارے میں انتقامی کارروائیوں میں خواتین اور بچوں سمیت فلسطینیوں کی گرفتاریوں کا سلسلہ جاری رکھا ہوا ہے۔
فلسطینی ذرائع ابلاغ کے مطابق غیر قانونی صیہونی ریاست کی نام نہاد فوج نے رام اللہ،القدس، بیت لحم، نابلس، سلفیت، طوباس اور اریحا سمیت مقبوضہ فلسطین کے مختلف علاقوں میں فلسطینیوں کے خلاف انتقامی کارروائیوں کا سلسلہ جاری رکھا ہوا ہے، صیہونی افواج نے گذشتہ چوبیس گھنٹوں کے دوران خواتین اور بچوں سمیت 22 فلسطینیوں کو گرفتار کیا۔
چھاپہ مار کارروائیوں کے دوران صیہونی افواج نے روایتی لوٹ مار کرتےہوئے فلسطینیوں کو زدوکوب کیا اور گھروں سے رقم کے ساتھ ساتھ قیمتی اشیا بھی لوٹ لیں۔
فلسطینی ذرائع ابلاغ نےبتایا ہے کہ 7 اکتوبر سے کل منگل تک مقبوضہ مغربی کنارے سے حراست میں لیے گئے فلسطینیوں کی تعداد بڑھ کر 9,025 ہو گئی جس میں خواتین اور بچوں سمیت وہ فلسطینی بھی شامل ہیں جو اپنی سزا پوری کرنے کے بعد حالیہ رہا کئے گئے تھے۔