(روز نامہ قدس ۔آنلائن خبر رساں ادارہ ) صہیونی وزیر اعظم بنجمن نیتن یاہو نے آج جمعہ کو محصور شہر غزہ کےمحاصرے کو مزید سخت کرنے کے ساتھ ساتھ شہر میں رسد کے داخلے کو مکمل طورپر روکنے کا حکم دیا ہے۔
فلسطین پر قابض غیر قانونی صہیونی ریاست کے میڈیا ذرائع نے انکشاف کیا ہے کہ صہیونی وزیراعظم نیتن یاھو نے مزاحمت کاروں کی جانب سے اسرائیل کے متعددشہروں کو نشانہ بنانے کےبعد اعلان کیا ہے کہ غزہ شہرمیں رسد کے تمام راستے مکمل طوپر بند کردیئے جائیں۔انھوں نے کہا ہے کہ "ہم غزہ میں ایندھن یا کسی بھی قسم کا سامان لانے کے لیے ایریز اور کریم شالوم کراسنگ کو کھولنے کی اجازت نہیں دیں گے۔”
غزہ کی میں فلسطینی توانائی اور قدرتی وسائل کی اتھارٹی نے کہا کہ غزہ کی موجودہ صورتحال اسرائیلی ناکہ بندی اور شہر پر جاری صہیونی جارحیت کے تحت گزرگاہوں کی بندش کی وجہ سے ایک انسانی بحران پیدا ہوگا۔
اتھارٹی نے کہا ہے کہ غزہ میں بجلی کے پاور پلانٹ کو چلانے کے لیے درکار ایندھن کی مقدار انتہائی قلیل رہ گئی ہے اسرائیل کی جانب سے گزرگاہوں کی بندش سے شہر میں بجلی کی فراہمی مکمل طورپر منقتع ہوجائےگی۔