(روز نامہ قدس ۔آنلائن خبر رساں ادارہ ) صہیونی ریاست فلسطینیوں کو شہید کرنے کے لئے اسرائیلی جیلوں کو منظم قتل گاہ کے طور پر استعمال کررہی ہے،70 بیمار فلسطینیوں کا اسرائیلی جیل میں محض علاج نا ہونے کی وجہ سے انتقال ہوا۔
فلسطینی سرکاری نیوز ایجنسی وفا کی رپورٹ کے مطابق فلسطینی پارلیمنٹ کے رکن احمد عطون نے صہیونی جیل میں ناصر ابو حمید کی مظلومانہ موت پر گہرے دکھ اور تشویش کا اظہا رکرتے ہوئے کہا ہے کہ صہیونی ریاست مظلوم فلسطینیوں کے خلاف جیلوں کو منظم قتل گاہ کے طورپر استعمال کررہی ہے۔
انھوں نے کہا کہ اسرائیلی جیلوں میں اب تک 233 فلسطینی قیدیوں کا انتقال ہو چکا ہے۔ ان میں سے 70 وہ فلسطینی قیدی تھے جن کا انتقال اسرائیلی جیل انتظامیہ کی فلسطینی قیدیوں کو علاج سے جان بوجھ کر محروم رکھنے کی وجہ سے ہوا۔
ایم پی عطون نے کینسر کے مہلک مرض کا جیل میں شکار ہو کر بروقت اور مناسب علاج نہ ملنے کی وجہ سے انتقال کرنے والے ابو حمید کے اہل خانہ سے تعزیت کی اور فلسطینی رہنماؤں سے مطالبہ کیا کہ اسرائیلی جیلوں میں قید فلسطینیوں کی رہائی کے لیے اقدامات کو تیز کیا جائے۔