(روز نامہ قدس ۔آنلائن خبر رساں ادارہ ) دونوں شہید نوجوانوں کو سر میں گولیاں ماری گئیں جبکہ زخمیوں میں ایک 50 سالہ فلسطینی خاتون بھی شامل ہیں جن کو صیہونی فورسزنے چار گولیاں مار کرشدید زخمی کیا۔
فلسطین پر قابض غیر قانونی صیہونی ریاست اسرائیل کی نام نہاد سیکیورٹی فورسز نے گذشتہ روز مقبوضہ مغربی کنارے کے شہر نابلس کے مشرق میں واقع بلاطہ پناہ گزین کیمپ پر دھاوابولا اور تلاشی کے نام پر روایتی لوٹ مار اور تشدد شروع کیا جس کے خلاف فلسطینیوں نے مزاحمت کی۔
غاصب فورسز نے احتجاج کرنے والے فلسطینیوں کو منتشر کرنے کےلئے آنسو گیس کی شیلنگ کی اور براہ راست فائرنگ کی جس نتیجے میں 32 سالہ نوجوان سعید جہاد شاکر مشاہ اور 19 سالہ عدنان وسیم یوسف العرج شہید ہوگئے، مقبوضہ نابلس میں فلسطینی ہلال احمر میں ایمبولینس اور ایمرجنسی کے ڈائریکٹر احمد جبریل نے بتایا کہ دونوں نوجوانوں کو صیہونی فورسز نے سر میں گولیاں مار کر شہید کیا۔
صیہونی فورسز کی وحشیانہ کارروائی میں تین فلسطین زخمی ہوئے ہیں جن میں ایک 50 سالہ فلسطینی خاتون بھی شامل ہیں جن کو چار گولیاں مار کرشدید زخمی کیاگیا ہے۔