(روزنامہ قدس ۔آن لائن خبر رساں ادارہ) مسلحہ اسرائیلی فوجیوں کے ہاتھوں زخمی فلسطینیوں میں ایک کی ٹانگ میں گولی لگی اور دوسرے کے بازو پر جبکہ تیسرےفلسطینی کی گردن اور چہرہ فوجی حملے کے دوران دستی بم سے جھلس گیا۔
فلسطینی وزارت صحت کی جانب سے تصدیق کی گئی ہے کہ اسرائیلی قابض فوج نے علی الصبح مقبوضہ مغربی کنارے کے علاقے نابلس میں واقع بلاطہ پناہ گزین کیمپ میں ایک فلسطینی نوجوان کو گولی مار کر شہید کر دیا۔
وزارت صحت نے اپنے تصدیقی بیان میں شہید ہونے والے 17 سالہ نوجوان نادر ہیثم ریان کے حوالے سے مزید آگاہ کیا ہے کہ صہیونی فوجیوں نے نہتے شہری کو سر، سینے، پیٹ اور ہاتھ میں کئی گولیاں ماریں جس کے نتیجے میں وہ شدید زخمی ہو ا اور بعد ازاں شہید ہوگیا۔
صہیونی فوجیوں کے اس دھاوے میں نوجوان کی شہادت کے بعد فلسطینی باشندوں کی جانب سے بھی جوابی حملے ہوئے اور کیمپ کے مکینوں نے فوجیوں پر پتھراؤ کیا تاہم صہیونی فوجیوں نے فلسطینی باشندوں پر براہ راست فائرنگ شروع کر دی اور مزید تین فلسطینی شدید زخمی ہوگئےجنہیں اپنی مدد آپ کے تحت ہسپتال منتقل کر دیا ہے، قابض فوج نے کم سے کم 9 فلسطینی نوجوانوں کو بھی گرفتار کر لیا جبکہ درجنوں کو بندوق کے بٹوں سے زخمی کر دیا۔