(روزنامہ قدس ۔آن لائن خبر رساں ادارہ) صہیونی فوج نےفلسطینی علاقوں میں شہریوں کو گھروں سے باہر نکال کر بغیر کسی جرم کے سر عام تشدد کیا اورخواتین کو لاٹھیوں اور بندوق کے بٹوں سے لہو لہان کردیا۔
ذرائع کے مطابق گذشتہ روزقابض ریاست اسرائیل میں صہیونی فوج نے مقبوضہ مغربی کنارے کے متعدد علاقوں میں پرتشددفوجی چھاپوں کے دوران فلسطینی باشندوں کے گھروں میں داخل ہوکر روائیتی توڑ پھوڑ رتے ہوئے املاک کو شدید نقصان پہنچایا اور 11 فلسطینیوں کو وحشیانہ تشدد کا نشانہ بناتے ہوئے حراست میں لے لیا۔
صہیونی فوج نے الخلیل ، نابلس کے بیتا قصبے، جنین، الطوراور جبل المکبر سمیت دیگر علاقوں میں شہریوں کو گھروں سے باہر نکال کر بغیر کسی جرم کے سر عام تشدد کیا اور ان کے خاندان کے خواتین کو فوجی تشدد سے روکنے کی پاداش میں لاٹھیوں اور بندوق کے بٹوں سے لہو لہان کر دیا۔
واضح رہے کہ گذشتہ دو ماہ کے دوران قابض فوج نے مغربی کنارے میں خاص طور پر جنین میں انتقامی کارروائیوں کا سلسلہ شروع کر رکھا ہے جس کے نتیجے میں اب تک 8 سے زائد نوجوان شہید اور درجنوں زخمی ہو چکے ہیں جبکہ ایک بڑی تعداد ان فلسطینیوں کی ہے جنہیں صرف شک کی بنیاد پر صہیونی اہلکاروں نے گھروں سے اٹھا کر نامعلوم تفتیشی مقامات پر منتقل کردیا ہے۔