(روز نامہ قدس ۔آنلائن خبر رساں ادارہ ) صیہونی خفیہ ایجنسی شاباک نے اپنی رپورٹ میں انکشاف کیا ہے کہ گذشتہ سال فلسطینی مزاحمت کاروں نے اسرائیلی فوج اور آبادکاروں پر چھوٹے بڑے 300 سے زائد حملے کئے۔
غیر قانونی صہیونی ریاست اسرائیل کی معروف عبرانی ویب سائٹ "واللا” نے اپنی رپورٹ میں اسرائیل کی اندرونی سلامتی کی خفیہ ایجنسی شاباک کی رپورٹ کے حوالے سے سے کہا ہے کہ اسرائیل کی فوج اور دیگر سیکیورٹی اداروں میں فلسطینی مزاحمت کاروں کے غیر معمولی بڑھنے والے حملوں اور کارروائیوں کے حوالے سے شدید بے چینی پائی جارہی ہے۔
رپورٹ میں کہا گیا ہےکہ اگر اسرائیلی سیکیورٹی فورسز مزاحمت کاروں کے حملوں کور وکنے میں ناکام رہے تو نیا سال 2023 خونی ہوسکتا ہے۔
رپورٹ میں بتایا گیا ہے کہ فلسطینی مزاحمت کاروں نے گذشتہ 24 گھنٹوں کے دوران 4 کارروائیاں کی ہیں اور تمام کارروائیوں کے بعد مزاحمت کارو باآسانی فرار ہونے میں بھی کامیاب ہوچکے ہیں۔
رپورٹ میں بتایا گیا ہے کہ فلسطینی مزاحمت کاروں نے گذشتہ سال اسرائیلی فوج اور آبادکاروں پر چھوٹے بڑے 300 سے زائد حملے کئے، اگر صورتحال ایسی ہی رہے تو رواں سال کے دوران مزاحمتی کارروائیوں میں اضافہ ہو گا۔
رپورٹ میں مزیدکہا گیا ہے کہ مغربی کنارے میں بھاری مقدار میں ہتھیاروں کی ترسیل اور غزہ کی پٹی سے وہاں فنڈز کی مسلسل منتقلی کی وجہ سے کارروائیوں میں تیزی آئے گی۔