(روز نامہ قدس ۔آنلائن خبر رساں ادارہ ) اردن کا کہنا ہے کہ صہیونی وزیر کی جانب سے دیا گیا بیان ، بین الاقوامی اصولوں اور اردن اسرائیل امن معاہدے کی خلاف ورزی ہے۔
اردن کی وزارت خارجہ کے ترجمان سنان المجالی نے انتہائی دائیں بازو کی "مذہبی صیہونیت” پارٹی کے سربراہ اور صہیونی ریاست کے وزیر خزانہ بتسلائیل سموتریچ کے فرانس کے شہر پیرس میں "اسرائیل” کے نقشے کے استعمال اور اردن کو اسرائیل کی سرحدوں میں دکھانے کی شدید مذمت کرتے ہوئے کہا ہے کہ صہیونی وزیر کا بیان بین القوامی اصولوں اور اردن اسرائیل امن معاہدے کی خلاف ورزی ہے۔
سموٹریچ کو گذشتہ روز فرانس میں بنیاد پرست صیہونی کارکن اور لیکود پارٹی کے سابق سربراہ جیکیوس کُپفر کے اعزاز میں ایک شام میں شرکت کے لیے پیرس مدعو کیا گیا تھاجہاں انھوں نے متعدد نسل پرستانہ اور متنازع بیانات دیئے جس کی مختلف انسانی حقوق کے اداروں کی جانب سے مذمت کی گئی۔
تقریب میں انتہا پسند صہیونی وزیر نے تقریب میں شرکت کے دوران فلسطین پر قابض صہیونی ریاست کا نقشہ دکھایا جس میں مقبوضہ فلسطین کے ساتھ ساتھ اردن کی سرحدیں بھی شامل تھیں، اسرائیلی وزیر کے اس اقدام پر اردن نے شدید مذمت کرتے ہوئے اس کو بین الاقوامی اصولوں اور اردن اسرائیل امن معاہدے کی خلاف ورزی قرار دیا۔