(روز نامہ قدس ۔آنلائن خبر رساں ادارہ ) گورنر سندھ نے کہا کہ مظلوم فلسطینیوں پر اسرائیل کے حملے جنگی جرائم ہیں، پناہ گزین کیمپوں، چرچ اور ہسپتال کو نشانہ بنانا اسرائیل کی سفاکیت کا ثبوت ہے، فلسطینیوں پر اسرائیلی مظالم کی مذمت کرتے ہیں۔
گورنر سندھ کامران خان ٹیسوری نے پاکستان میں متعین فلسطینی سفیر احمد جواد ربیعی سے سفارتخانے میں ماقات کی۔
ملاقات کے دوران گورنر سندھ نے پاکستانی عوام کی جانب سے فلسطین کے ساتھ مکمل یک جہتی کا اظہار کرتے ہوئے کہا کہ فلسطینیوں پر اسرائیل کے حملوں کی شدید مذمت کرتا ہوں، نہتے فلسطینیوں پر اسرائیل کے حملے جنگی جرائم کے مترادف ہیں۔ اسپتال اور پناہ گزین کیمپوں کو نشانہ بنانا اسرائیل کی بربریت کا ثبوت ہے۔
کامران ٹیسوری نے کہا کہ ہم آگے بڑھیں اور ثابت کریں کہ ہم سچے مسلمان ہیں، فلسطینیوں پر ہونے والے مظالم پر دل خون کے آنسورو رہا ہے، ہم اپنی استطاعت کے تحت جوکر سکے کریں گے، ہم نے ایک پاکستانی ہوکر آواز بلند کرنی ہے، عالمی برادری کو اسرائیلی افواج کی بربریت کا نوٹس لینا چاہئے، ہمیں غلامی کی زنجیروں کو توڑنا ہے۔