(روز نامہ قدس ۔آنلائن خبر رساں ادارہ ) صہیونی ریاست کے خلاف سرگرمیوں میں ملوث ہونے کےالزام میں فلسطینی نوجوان کو صہیونی عدالت نے 24 سال قید کی سزا سنائی تھی۔
فلسطینی قیدیوں کی تفصیلات رکھنےوالے ادارے فلسطینی پرزنرز کلب کی جانب سے جاری کردہ رپورٹ میں انکشاف کیا گیا ہے کہ فلسطینی شہر قلقیلہ سے تعلق رکھنے والے 28 سالہ فلسطینی احمد سلامہ پیر 12 دسمبر 2022 کو صہیونی زندان میں اپنی زندگی کےبیسویں سال میں داخل ہوگئے ہیں۔
احمد سلامہ کو صہیونی فورسز نے 2003 میں صہیونی ریاست کے خلاف سرگرمیوں میں ملوث ہونے کے الزام میں گرفتار کیا تھا جس کے بعد سے انھیں بدترین تشدد کانشانہ بنایا گیا ہے جس کے باعث وہ اپنے دائیں بازو سے معذور ہوگئے ہیں ۔
احمد سلامہ نے اسرائیلی زندان میں ہی اپنی بیچلر کی ڈگری حاصل کی اور اب وہ ماسٹر کی ڈگری مکمل کر رہے ہیں۔
رپورٹ میں یہ بھی انکشاف کیا گیا ہے کہ اس وقت 4,700 فلسطینی صہیونی ریاست کے زیر انتظام 23 جیلوں اور حراستی مراکز میں پابد سلاسل ہیں۔