(روز نامہ قدس ۔آنلائن خبر رساں ادارہ ) غزہ میں ماہی گیر یونین کمیٹیوں کے سربراہ نے انکشاف کیا ہے کہ گذشتہ سال میں صہیونی فورسز نے ماہانہ کم سے کم 30 مرتبہ فلسطینی ماہی گیروں پر حملہ کیاان کی کشتیاں تباہ کی اور گرفتاریاں کیں۔
غزہ میں ماہی گیر یونین کمیٹیوں کے سربراہ زکریا بکرنے مقامی میڈیا سے گفتگو کرتے ہوئے بتایا ہے کہ غیر قانونی صہیونی ریاست کی بحریہ نے آج صبح محصور شہر غزہ کے مغرب میں السودانیہ کے علاقے کے قریب مچھلیوں کے شکار میں مصروف فلسطینی ماہی گیر خلدون اور رجب ابوریالہ پر فائرنگ کی جس کے نیتجے میں دونوں زخمی ہوگئے جبکہ ان کی کشتیوں کو قبضے میں لے لیا۔
ماہی گیر یونین کمیٹیوں کے سربراہ نے بتایا کہ گذشتہ سولہ سالوں سے اسرائیل کی جانب سے نافذ کردہ غیر قانونی معاشی ناکہ بندی سے فلسطینی سنگین معاشی صورتحال کا شکار ہیں جبکہ 5000 سے زائد فلسطینی ماہی گیری کے شعبے سے وابستہ ہیں جن کو اسرائیلی افواج منظم طریقے سے نشانہ بناتی ہے۔